नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले दुई दलहरू नेपाली कांग्रेस र एमाले मिलेर जनताले प्राप्त उपलब्धी र अधिकार खोस्न लागेको बताएका छन्।
शनिबार पुष्पलाल अध्ययन केन्द्रले काठमाडौंमा गरेको कार्यक्रम दुई ठूला दलले मिल्नु सामान्यतः स्वभाविक नमानिने बताउँदै प्रचण्डले देशलाई दुई दलीय व्यवस्था र संविधान संसोधनको उद्धेश्य लिएर कांग्रेस र एमाले मिलेको बताएका हुन्।
उनले जनताको लामो आन्दोलन र ठूलो बलिदानीपछि प्राप्त अधिकार खोस्ने प्रयत्नलाई सफल हुन नदिने पनि बताए।
‘हामी कुनैपनि हालतमा त्यसो हुन दिँदैनौं। फेरि जरूरी पर्यो भने सडकमा पलेटी कसेर र जनताको साथमा बसेर भएपनि दुष्प्रयासलाई सफल हुन दिन्नौं,’ उनले भने।
उनले अहिले सरकारमा भएका दुई दलले गर्न खोजेको संसोधन जनताले प्राप्त गरेका अधिकारलाई पनि खोस्न खोज्ने र देशलाई फेरि पहिलेकै जस्तो निरंकुशतातर्फ लैजाने प्रयास रहेको उनले बताए।
यद्यपि संविधान संसोधन गर्नुपर्ने पक्षमा आफू पनि रहेको अध्यक्ष प्रचण्डले बताएका छन् ।
प्रकाशित : २०८१ श्रावण १२, शनिबार १९:४९ गते
